紅魔接令大舉攻門

國冠盃「長勝軍」曼聯明早再度登場，移師美國芝加哥迎戰巴黎聖日耳門（PSG）！兩大豪門近期就迪馬利亞轉會問題討價還價，拗到面紅耳熱，呢位阿根廷國腳仲「玩失蹤」唔歸隊，辣（慶）紅魔主帥領隊尹戈爾，今仗點都要畀啲顏色對手睇。不過聖日耳門亦非善類，兩位射手伊巴謙莫域、卡雲尼「卡士」十足，加上曼聯防線麻麻，首選入球大。（有線61、64、201、203台周四早上9時05分直播）

上仗贏巴塞 信心爆棚
尹戈爾日前被傳媒問到迪馬利亞「失蹤」事件，黑晒面答乜都唔知，擺明不滿呢位中場同聖日耳門私下傾掂數，干脆唔歸隊準備入「門」，當佢老人家透明，梗係發火啦，相信今仗會派強陣教訓呢支法甲球隊。呢項賽事非常旺紅魔鬼，繼上屆捧盃後，今屆又錄得3戰全勝，全隊球員狀態相當弗，隊長朗尼、新兵迪比、舒尼達連，以至大後備連格、贊奴沙，皆取得入球，無論領隊尹戈爾上下半場點換人變陣，都足以維持火力，上仗以3比1擊敗「地上最強」巴塞隆拿後信心爆棚，今場對聖日耳門未驚過。

伊巴卡雲尼 孭起ＰＳＧ
聖日耳門今屆先贏賓菲加3比2，再以4比2擊敗費倫天拿，即使上仗同車路士90分鐘打成1比1並最終射輸12碼，但PSG有14次攻門，比車仔多超過一倍，表現相當進取。呢支法甲冠軍進攻人腳鼎盛，伊巴謙莫域上仗入波之餘，仲撞到泰利飛起，以佢嘅「霸氣」風格，曼聯防線好難招架。

另外，有傳卡雲尼可能轉投曼聯，正好趁機喺尹戈爾面前「騷哥利」，唔好忘記中堅大衞雷斯都有強勁助攻力，教練白蘭斯効力過曼聯，了解對手虛實，聖日耳門入波機會樂觀，捧大盤最正路。