美職明星隊擺大個頭撼熱刺

美職明星隊對邀請隊嘅賽事今年已經踏入第10年，今屆就搵嚟熱刺拍跳，往年一向都係以邀請隊做主角，不過今年就唔同嘞，事關美職明星隊嘅牌面可謂歷代最強，集齊多名前英超、西甲、意甲巨星，真係齋睇星都抵！睇番近5年明星賽嘅往績，當中有4次開大，今場一於再追大。(TVB 301周四早上9時直播)

過去幾年，美職明星隊嘅對手有曼聯、車路士、拜仁慕尼黑等頂級勁旅，今年請來嘅熱刺，卡士同星味無疑都差咗多少，陣中最大名氣嘅哈利卡尼同基斯甸艾歷臣都未去到世界頂尖級數，況且熱刺呢隊波防守向來唔算好硬淨，今場仲連陣中另一較有星味嘅門將洛里斯都因傷缺陣，睇嚟防線想唔失波都幾難。

表演賽多演入球騷
主隊美職明星隊有謝拉特、卡卡、韋拿、羅比堅尼、基奧雲高等球星，連啱啱踢完美洲金盃嘅前美國隊長丹普西都有入選，雖然林柏特因傷落選，由紐約紅牛中場達斯麥卡地補上，冇得睇「雙特」再次合作，不過中場仍然有謝拉特拍住卡卡喎，勁有新鮮感，真係諗起都覺得正呀！呢類表演賽通常都係娛樂性較高，更何況美職明星隊前場有咁多技術一流嘅球星，梗係要上演番場入球騷畀球迷欣賞啦！