拜仁強陣谷到恒

喺中國行取得兩連勝嘅德甲班霸拜仁慕尼黑，今晚將移師廣州天河體育場，同FC廣州（廣州恒大淘寶）踢此行最後一場比賽，經過兩場硬仗後，拜仁一眾遲歸隊嘅國腳狀態循序漸進，陣容亦逐步完整；相反FC廣州正處於巴西新帥史高拉利嘅磨合期，近期陣容不整仲要忙於應付中超緊密賽程，相信唔會有太濃戰意喺呢場表演賽打老虎，推介拜仁讓球客勝。

（now 670周四晚7時35分直播）

留力中超 恒大唔敢冒險
拜仁中國之旅先後以4比1同1比0擊敗華倫西亞及國際米蘭，首仗取勝過程十分輕鬆，次仗遇上全力主守嘅國米，喺控制戰局下悶戰小勝，但經此兩仗，幾名遲歸隊嘅主力包括羅拔利雲度夫斯基、湯馬士梅拿、謝路美保定同馬里奧葛斯等已逐步重拾狀態，教練哥迪奧拿可排出更完整陣容出擊，預期今晚會起用手上最佳人腳，為下周對禾夫斯堡嘅德國超級盃作最後檢閱。事實上，FC廣州財大氣粗早已聞名全球，遇上呢支中國第一品牌，拜仁眾將唔會掉以輕心，當然力爭以全勝姿態結束中國行。拜仁昨日抵達廣州受到球迷熱烈歡迎，今晚喺全場爆滿嘅天河體育場出師，預計得到嘅打氣聲唔會比主隊少。

FC廣州經歷簡拿華路領軍失敗後，新帥史高拉利需要時間重整球隊，佢哋雖然連續5年取得中超首循環冠軍，但得分係近年最低，聯賽次循環展開後亦諸事不順，目前退居次席落後上海上港1分，嚟緊周日作客杭州綠城不容有失，現時陣中既有射手艾傑臣、中場列卡度高拉特同黃博文都養傷，前鋒郜林、中場于漢超同中堅馮瀟霆亦有傷，預期唔會冒險上陣。

初嚟甫到 羅賓奴未夠弗
至於今仗最大亮點的恒大新援羅賓奴，由於周一晚才抵達廣州報到，今場即使踢得都唔可能有十足狀態，隊長鄭智停滿復出預期亦唔會踢足全場，殘陣遇勁敵睇怕幾難發圍。

兩軍喺2013年世冠盃4強戰曾經交手，拜仁以3比0輕勝，全場射門次數係一面倒嘅27比2，何況當時FC廣州仲有穆里奇、孔卡同艾傑臣等猛將助陣，如今前兩者已離隊，後者缺陣，球隊實力明顯比兩年前差，再戰拜仁恐難轉弱為強。