朗尼爸歸位 紅魔「加」演入球騷

國際冠軍盃美國站賽事輪到曼聯出場，無論你撐曼定反曼都要吼實，CF阿美利加聽朝對曼聯，1.48倍入球大最抵玩！雖然曼聯放走兩大射手法卡奧同尹佩斯，但朗尼歸位打番正箭頭，相信係大爆發嘅開始，特別係佢最近宣布老婆又有咗，梗係要入波賀自己第3次做老竇啦！（有線61、64、201及203、廣東體育周六早上11:05直播）

CF阿美利加喺國冠盃首戰以1:2不敵洛杉磯銀河後，日前以2:1反勝聖荷西地震，連續兩場開入球大，冇錯佢哋有包括射手奧利比柏拉達在內嘅4個墨西哥國腳踢緊美洲金盃，但球員落到場唔似踢熱身賽交行貨，特別係射手卡路士昆特路好似搶錢咁，完全唔錫力，我相信佢哋今場會繼續搏。

阿美利加落力連開2場大
至於曼聯上季喺英超得第4名，隊長朗尼已講明，今季目標係爭冠軍。或者大家對紅魔領隊尹戈爾冇乜信心，但朗尼唔同喎，佢每次重返正箭頭位置，都幾乎肯定會交出超高入球數字，難得法卡奧同尹佩斯已分別被清洗，老婆麥露蓮又證實第3次有BB，呢個時候朗尼實恨入波恨到發癲。

曼聯4新兵候命
再講，就算前鋒查維亞靴南迪斯、中場迪馬利亞、馬高斯盧祖同右閘拉菲爾達施華冇隨隊，紅魔仲有新加盟嘅前鋒迪比、中場舒韋恩史迪加、舒尼達連同右閘達美安可以候命，佢哋4個都可以幫手策動，加上尹戈爾上季領軍踢6場熱身賽有5場開入球大，包括頭場大勝洛杉磯銀河7:0，玩大着數！