銀河-1踩多腳

地震4連敗散晒
星光熠熠嘅洛杉磯銀河，啱啱喺美聯盃8強賽事輸咗畀皇家鹽湖城慘被淘汰，相信唔少球迷都會好失望。不過，銀河聽朝會喺美職主場對聖荷西地震，應該可以一洗頹風，因為對手地震已經連輸4場，今仗仲要去到主場錄得4連勝嘅銀河地頭出戰，相信都係凶多吉少。阿謙睇好銀河可以炒番場重振雄風，直取有2.4倍分頭嘅讓球主勝！

（TVB 301周六早上11時直播）

銀河係今夏傳媒嘅焦點，因為球隊增兵計劃充滿話題，前利物浦隊長謝拉特加盟後已經踢咗兩場，加上墨西哥國腳杜斯山度士亦落實加盟，以上消息相信令球隊會有更強爭勝心。

謝拉特逐漸上力
銀河近期賽事頻繁，周日早上踢完國冠盃贏波，周三朝早就喺美聯盃8強輸波出局，加上門將彭尼度同埋射手薩迪斯及後衞奧馬干沙利斯分別代表巴拿馬同美國踢緊美洲金盃而缺陣，球隊陣容其實都唔太完整。幸好銀河射手羅比堅尼近況唔錯，加上踢咗兩場波嘅謝拉特相信已逐漸摸熟美職嘅比賽節奏，相信會有唔同嘅演出，而且銀河近4仗主場出擊悉數贏波，今仗有望攞到好成績。

地震同銀河一樣近期都有唔少賽事，但佢哋嘅戰績認真麻麻，已經連輸4場。地震戰績咁曳，同佢哋前線兩位主力，哥迪爾卡圖同雲度路斯基畀千里達同美國徵召踢美洲金盃有關，尤其雲度路斯基係球隊進攻核心，地震喺佢缺陣嘅賽事輸晒之餘只係入得1球，加上其餘前鋒好似恩洛辛艾馬加拉及連赫特未傷愈，導致火力大減，今仗更要作客出戰啱啱輸波谷埋一肚氣嘅銀河，相信地震都係等做炮灰。