紅軍玩認真獅吼有難

利物浦今夏遠東之旅第2站係造訪「袋鼠國」澳洲，將會進行兩場熱身賽，今午率先作客澳職布里斯班獅吼。紅軍未受「二五寧」史達寧叛投曼城嘅消息影響，早前喺泰國踢熱身賽踢得好認真，尤其係外借回歸嘅前鋒奧歷治堅搶韁，好想趁住呢類季前「拍跳」，喺主帥羅渣士面前博加分，撞正冇態嘅獅吼可乘勝追擊，斯維力撐紅軍讓球客勝。（有線61、64、201及203台周五下午4時45分直播）

奧歷治回歸 搏殺爭上位
雖然史達寧係紅軍進攻核心，但佢想走人嘅消息已傳蘊釀咗大半季，因此最終叛投曼城係意料中事，中場盧卡斯寸爆話「二五寧」離隊嘅影響，難與上季冇咗蘇亞雷斯相提並論。從日前喺大雨中輕取泰國明星隊4粒之役，可見利物浦眾將迅速投入比賽，就算狀態未弗都冇Hea踢，值得一提係奧歷治，呢位上季加盟後再借番畀里爾一年嘅比利時前鋒，回歸後格外搏命，上仗後備入替唔單止有波入，整個下半場更非常搶韁係咁起腳，賽後連羅帥都勁讚，趁住巴洛迪利、波連尼、羅拔圖法明奴等前鋒此行冇隨隊，奧歷治梗係要使出渾身解數博上位。

另一邊廂，布里斯班獅吼自6月頭後未曾比賽過，狀態唔慌弗，中場主力沙路達又轉投荷甲球隊烏德勒支，隊長麥特麥基、守將迪維利同門將迪奧列托斯均因傷缺陣，陣容不整兼冇態，預計紅軍可大勝延續強勢，讓球客勝咪錯過。