不死鳥新帥上任博反彈

日乙球隊京都不死鳥前日宣布因為成績唔理想，正式解除教練和田昌裕嘅職務，將由名宿助教石丸清隆坐正領軍，今日作客遇着近況同樣低沉嘅長崎成功丸，喺新人事新作風之下有力反彈，讓球主客和不死鳥受讓一球，梗係揀讓球客勝。（周日下午5時開賽）

大黑將志客戰有料到
京都不死鳥近五場聯賽輸咗四場，聯賽榜已跌落第18位，只係領先尾二嘅FC岐阜3分，為免捲入降班漩渦，球會決定向教練和田昌裕開刀，由助教石丸清隆接掌帥印。石丸清隆球員生涯曾為京都不死鳥上陣超過一百二十場，喺球會有一定聲望，相信可為近期冇咩士氣嘅球隊帶來新衝擊同思維。球隊近兩場聯賽雖然冇波入，但前日本國腳大黑將志今季所入十個聯賽入波有八球於客場取得，作客腳風特別順，今場有機會助球隊打破入球荒。

講到入球荒，主隊長崎成功丸更嚴重，上輪比賽前已連續六場交白卷，就算上場有高橋祐太郎於末段入波逼和岡山綠雉，亦唔見有任何反彈本錢。長崎成功丸自2013年升上日乙，對上兩季主場迎戰京都不死鳥俱以0比1見負，近況、往績都冇優勢，今場難讓對手。