紐約城狙擊多倫多

林伯未出得 韋拿夠殺
林柏特登陸美職一波三折，呢位37歲英格蘭名將原定今輪聯賽登場，為紐約城披甲主場對FC多倫多，點知操練時受傷，起碼要延後一周先至可以上演美職處子戰，紐約城球迷難免失望。好在陣中另一位球星韋拿近況大勇，主場仍力足擊敗殘陣嘅FC多倫多，一於捧1.8倍主W。（TVB 301周一凌晨3時直播）

林柏特月初歸隊，早前紐約城於打吡戰對紐約紅牛，佢亦有入場為球隊打氣，原定今場對FC多倫多正式上陣同美職球迷見面，但卻喺前日操練時拉傷小腿。雖然傷勢唔算嚴重，不過仍然需要抖幾日，美職處子戰要押後，「林伯」話：「我一直期待周日比賽，依家被迫錯過當然好失望。軍醫建議我要休息幾日，相信好快可全面復操。」意味「林伯」可望喺下周日朝早作客新英倫革命上陣。

至於紐約城另一位新簽球星派路，就要等到27日對奧蘭多城先有望披甲。雖然兩大猛將未落得場，但紐約城今仗仲有韋拿孭飛，呢位西班牙射手愈戰愈勇，上仗又梅開二度，近3仗入4球，主場出擊值得信賴。

客軍受金盃拖累唔齊腳
FC多倫多有基奧雲高助陣，呢位「小巨人」今季亦入咗8球，不過兩位曾於英超搵食嘅艾迪杜里及米高巴特利被美國徵召踢美洲金盃，中場莊拿芬奧蘇里奧、後衞艾殊頓摩根亦被加拿大國家隊抽走，令FC多倫多實力打折扣，上仗即吞洛杉磯銀河4蛋，睇怕今場凶多吉少。