捧牙買加飛黃騰「達」

捧牙買加飛黃騰「達」 
  
美洲金盃明早繼續有賽事開打，哥斯達黎加分組賽首戰將會出戰牙買加；牙買加有多名球員打完美洲國家盃再戰金盃，狀態甚有可能喺哥斯達黎加之上，後者更有多名主力避戰，實力同上屆世界盃時有距離，基於排名同名氣牙買加都輸一截，受讓十分抵玩，呢場捧「讓客」不需要考慮。（周三16，香港時間周四8:00am開賽）

哥斯達黎加上屆世界盃一鳴驚人，壓過英軍意大利出線，不過當時主力兼功臣之一嘅門將基洛拿華斯，因傷今次冇被徵召，防守能力已差一截，而前線雖然續有祖爾甘保及拜仁雷斯，但球隊向來靠反擊搵食，如守都未穩又何來入球，而隊中大部分球員都來自國內聯賽，似乎教練都想借今次大賽練兵預備嚟緊世界盃外圍賽，有幾大戰意喺今次金盃爭功係未知之數。
牙買加因應邀請出戰美洲國家盃，3戰全敗0分出局，不過整體嚟講實在打得唔差，至少3戰都只係以0:1見負，而睇番佢哋今次大軍名單，韋斯布朗、馬里亞柏都繼續入選，僅7人打完美洲盃冇繼續出戰今次金盃，可想而知球隊喺狀態上肯定維持到一定水平。事實上，過去3場美洲盃牙買加都只係輸1粒，防守力絕對值得信賴，既然阿根廷烏拉圭都只能夠喺佢哋身上僅勝，不擅主攻嘅哥斯達黎加似乎更加難取得入球。

哥斯達黎加近況差

哥斯達黎加世盃過後，由上年開始都打咗多場熱身賽，但對上6戰只取3負3和，當中面對巴拿馬都要輸波，面對巴拉圭都只係踢成0:0，更加唔好講對哥倫比亞及西班牙等強隊，可以睇得出哥斯達黎加自世盃後實力有一定倒退，所以今次金盃首戰喺盤口上竟然要讓一隊熱夠身嘅牙買加，道理上已講唔通，捧牙買加事在必行。