多蒙特東瀛遊大晒冷

德甲勁旅多蒙特趁抖暑去亞洲踢熱身賽，今晚佢哋先會喺日本對川崎前鋒。前鋒正為嚟緊嘅日職次階段作準備，肯定唔會「龜縮」迎戰；「蜜蜂兵團」剛喺熱身賽大勝對手，狀態唔錯就算遠征都會踢得進取，阿King相信今場多入波，一於捧大盤。（周二晚6時開賽）

川崎前鋒踢法有前冇後
前鋒喺剛過去嘅日職首階段排第5，17場賽事攻入32球失咗26球，攻力僅次於冠軍浦和紅鑽，但失球仲多過排第16嘅山形山神，可見佢哋「入得又失得」。射手大久保嘉人同雲拿天奴拿把握能力高，首階段賽事合共入咗19球，加上球隊有前冇後踢法，相信會同多蒙特鬥入波娛賓。

多蒙特上季只得第7，球隊今夏積極擴軍，分別簽咗弗賴堡嘅門將路文貝基、利華古遜中場卡斯特羅等，實力有增無減，多軍剛喺上周六嘅熱身賽5比0輕取業餘球隊沃爾夫雷德，當中根度簡同米希達利恩有入波，連日本小將丸岡滿都有「士哥」，可見成班球員操到弗晒，今仗應會搶攻滿足球迷，大盤值得支持！