揭幕戰頂巴拿馬

美洲金盃A組揭幕戰，巴拿馬對海地，上屆亞軍巴拿馬牌面上秤先，但唔好忽略近年水準大躍進嘅海地，球隊推行「法國化」，除咗由法國籍主帥高拉治領軍，仲有法甲蘭斯門將柏拉斯迪把關，頂得住巴拿馬來襲，力撐受讓嘅海地讓球客勝。

（周三早上7時開賽、馬會網上文字直播）

推「法國化」見效
海地近年靜靜起革命，唔少國腳出外搵食，包括法甲蘭斯門將柏拉斯迪、法乙季軍昂熱後衞皮爾、拉瓦勒前鋒拿桑、仲有羅斯托夫守將高力士、比甲標準列治中場謝夫路爾斯等海外兵團，人腳質素唔差。領隊高拉治曾經喺巴黎聖日耳門青年軍工作，亦教過蘭斯、法國U18等歐洲球隊，有一定級數，佢上年執掌海地帥印後，球隊表現亦令人滿意，早前熱身賽作客中國隊，都不敗而回，今仗受讓有着數。

至於巴拿馬最有名氣球員係効力德乙聖保利嘅中場阿曼度谷巴，其他隊友主要喺中美洲地區搵食，能否重演上屆打入決賽嘅「奇迹」，實在令人懷疑。由於係今屆第1場比賽，預料雙方都唔想輸壞個頭，踢法應會比較謹慎，巴拿馬讓波制唔過。