王者寶座美墨輪流坐 大家唔熟美洲金盃？唔緊要，因為呢個盃賽一向畀美國同墨西哥玩晒！自1991年開始，美洲金盃一共舉行過12屆，貴為中北美洲霸主嘅墨西哥，曾6度封王，查實「仙人掌國」堅重視美洲金盃，從佢哋喺啱啱結束嘅美洲國家盃，只係派出二線兵「敷衍」可見一斑。美國亦唔輸蝕，攞過5次冠軍，包括上屆在「奇哥」奇連士文帶領下，重奪失落兩屆嘅錦標，走出谷底。 僅加拿大2000年破壟斷 墨、美實力遠超其他中北美洲球隊，夾埋擸咗11次冠軍，咁唯一一次打破佢哋壟斷嘅又係邊隊呢？係咪上年世盃殺入8強嘅哥斯達黎加？錯晒，哥軍從未試過染指金盃，反而加拿大於2000年嗰屆突然發威，於淘汰賽先後擊敗墨西哥同千里達，並喺決賽勇挫獲邀請參賽嘅南美球隊哥倫比亞，不嬲踢波唔叻嘅「楓葉國」總算威番鋪。