美國試陣等做「細」界

明早有場國際熱身賽，美國主場對危地馬拉，兩隊現時備戰緊下周三展開嘅美洲金盃，今場比賽旨在鬆下筋骨同試陣，相信會有所保留，一來要避免受傷，二來要隱藏實力，擾亂其他對手視線。因此，即使美國實力高一班，估計都唔會盡炒危地馬拉，一於博入球細。（周六早上6時30分開賽）

美洲金盃將於香港時間下周三早上展開，由美國同加拿大合辦。身為東道主嘅美國自然強陣出擊，領隊奇連士文徵召咗丹普西、米高巴特利、艾迪杜里、雲度路基斯、法比安莊臣等主將，屬於爭標熱門。不過臨近開幕，預料「奇哥」會留有一手，最緊要球員「身體健康」，以最佳陣容出戰決賽周，所以今場熱身賽應會點到即止，避免受傷，同無謂浪費體力。加上不宜過早表露實力，隨時Hea踢了事。

危地馬拉破門乏力
危地馬拉亦有球員喺美職搵食，包括西雅圖海灣者中場馬高柏巴、FC達拉斯後衞摩西斯靴南迪斯、皇家鹽湖城後衞伊利亞斯華斯基斯，但只屬平庸之輩。球隊仍然要靠35歲前鋒卡路士雷斯數胡，攻力信唔過。危地馬拉近7場僅入兩球就係最佳證明，相信無力威脅到美國大門。