日本英格蘭「和」氣生財

日本英格蘭「和」氣生財
     
大和撫子好波！日本女將一向喺世界球壇處領先地位，上屆更加比男子隊先行圓夢取下世界盃冠軍，而佢哋今屆一路殺入賽事4強，面對異軍突起嘅英格蘭應有實力打入決賽，不過三獅兵實力都唔簡單，呢場大有可以戰至加時，全場一於先捧和局，晉級球隊撐日本。（周三3，香港時間周四7:00am直播）

英國傳媒過去都甚少留意女足賽事，不過當那邊廂男子隊喺U21又分組賽出局，反而呢邊女足贏吓贏吓又殺入準決賽，都忍唔住揶揄一下啲男球星，話你班男子隊好應該學下女隊啲進攻戰術，如果一個唔小心女隊真係捧盃，班男人都真係咩面都冇晒。
不過講係咁講，英格蘭喺四強4隊波中，實力肯定係最弱一隊，佢哋雖然避過另一邊線兩支奪冠大熱德國同美國，對住有少少跌Watt嘅日本，都仍然冇贏波把握，連同分組賽5戰，佢哋首戰不敵法國，之後連贏4場2:1，雖然話過程上擊敗過挪威及加拿大等強隊，但球隊冇絕對入球重心，卡妮及布隆絲入兩球都已經係首席射手，日本出名控球力強，英軍喺僅有機會下要入波，似乎喺把握力上會輸蝕少少。

日本效率組織變弱

日本為上屆世盃冠軍，實力自然唔講得笑，不過對比起4年前，呢隊日本喺效率同組織力上似乎有啲不及，當中老將澤穗希上一圈雖然留力，但年事已高肯定不復當年勇，而其餘上屆奪冠球員，如前鋒大野忍、岩淵真奈、安滕梢等，都冇辦法代替澤穗希場上領導地位，見日本幾場打嚟章法依舊秀麗，但實際威脅唔多，似乎呢場4強戰會受到考驗。
過去4年歐洲女足發展急速，日本喺女足優勢已唔明顯，睇番英軍陣容，有多人來自國內班霸阿仙奴及曼城，反而日本外流兵只有6人，呢場波日本喺實力上只有微利，睇嚟都甚有可能待加時至決勝負。