紐約紅牛「宇宙」最強

紐約紅牛「宇宙」最強
 
紐約紅牛認真唔識得做人，剛剛喺上輪美職大炒有貴賓到訪嘅紐約城，估計佢哋嚟到美聯盃亦唔會突然轉死性，對住紐約宇宙分分鐘會贏波贏盤贈慶！（周三4，香港時間周四7:30am開賽）

上輪美職紐約紅牛作客紐約城成為焦點，一嚟係因為呢場波係「紐約市打吡戰」，二嚟即將加盟紐約城嘅林柏特同埋派路都係座上客，甚至連唔關事嘅加里夫巴利都幫主隊打氣，不過編為客隊嘅紅牛認真唔客氣，喺半場落後1球嘅情況下反勝3:1完場，令到以上嘅貴賓冇晒心機。既然上場波紅牛都冇放軟手腳，估計今次對住魯爾領軍嘅紐約宇宙亦都唔會畀面，睇埋射手巴利胡禮菲臘斯近日又再發威，開埋「讓主」都唔出奇。
另一隊名牌洛杉磯銀河就會作客聖荷西地震，有睇我哋《新報》都知道「神奇隊長」謝拉特已經抵達美國，雖然佢仲未可以落場，但係銀河點都想喺呢位球星面前贏番場波做見面禮嘅。（周三12，香港時間周四10:30am開賽）