瑞典葡萄牙大晒冷

U21歐國盃爭霸 決戰布拉格
U21歐國盃今晚喺捷克首都布拉格上演終極決賽，瑞典U21和葡萄牙U21繼分組賽後再碰頭，上次兩軍打和「合力」踢走意大利被質疑打「默契波」，今次嚟到決賽當然唔會再手軟。雙方剛喺準決賽大勝而回，士氣、信心爆晒燈，而且兩軍今屆入球分布甚廣火力夠，秉承近年決賽多波入傳統，大盤係投注首選。（周三凌晨2時45分開賽）

瑞典和葡萄牙今屆喺分組賽最後一輪打和令意大利飲恨出局，賽事最後幾分鐘仲出現「你唔攻、我唔搶」嘅垃圾時間，賽後兩軍被指欠缺體育精神，形象受損，故此今仗喺爭冠軍嘅同時亦要用行動證明「清白」，落場肯定搏甩髀。

近5屆決賽4開入球大
葡萄牙對上一次及唯一一次打入U21決賽係94年，當時陣中除咗擁有費高、雷哥斯達等超級巨星，現任教頭雷佐治亦係成員之一。葡萄牙今屆表現較慢熱，頭三場分組賽只入兩球，攻力唔算強，但去到上場4強卻忽然大爆發狂數德國5比0，而且5球全由不同球員射入，進攻點甚多，令對手防不勝防。兩大主力貝拿度施華及艾雲卡華利路上場喺下半場初段已先後被換走，明顯留力搏今仗，體力不成問題。

瑞典和葡萄牙一樣未攞過U21冠軍，除92年決賽不敵意大利屈居亞軍，09年以主辦國身份打入4強亦算近年水準之作。球隊今屆先後擊敗意大利及丹麥，踢過曼城嘅約翰古達迪及喺荷甲搵食嘅迪比寧已各入兩球，多入一粒便可追平捷克嘅克里蒙特登上射手榜首位，飢渴感十足。

後生仔踢波最講士氣，能夠進身決賽當然High到爆，所以近年U21決賽甚少出現悶場，例如上屆西班牙就同意大利合力炮製一場入球騷。如以中位數2.5球計，近五屆決賽共有四屆開入球大，唯一開細嘅都有兩個士哥，相信今屆亦唔會例外。