奧蘭多城主場有「機」   一隊波有冇心踢盃賽，睇吓佢哋個晉級過程就略知一二啦，好似奧蘭多城喺上圈美聯盃遇到查勒斯頓炮台，90分鐘之內踢成2:2平手，加時就4:4完場，最終互射12碼要射到8:7先至晉級，如果冇心爭呢個盃根本就唔使搞咁多嘢；今次奧蘭多城返回自己地頭，對番上個月尾先至和過嘅哥倫布機員，如果佢哋肯派出卡卡同埋施利拿連呢類正選落場，依然要睇高佢哋嘅晉級機會一線。（周二5，香港時間周三7:30am開賽） 另一隊美職球隊芝加哥火燄就遇到夏洛特獨立，不過呢條絕對唔係一條好籤，皆因客隊上輪正正就係淘汰美職嘅新英倫革命晉級；唔好忘記火燄喺近5戰輸成4場咁多，更加連續3戰都冇波入，作客嘅獨立只要好好把握呢次機會，話唔定可以創出奇蹟，再晉一級！（周二6，香港時間周三8:30am開賽）