阿根廷出線實至名「圭」

阿根廷出線實至名「圭」
 
美洲盃4強爭逐最後一個決賽席位！阿根廷上一圈以12碼淘汰哥倫比亞，美斯就話係球隊最佳演出，咁打得好唔好見仁見智，阿根廷喺4強對手只係巴拉圭，就真係睇唔出再有咩爆冷可能，阿根廷讓球盤開到「-1」，有坐和望贏優勢，咁都唔買真係走寶。（周二4，now681台周三7:30am直播）

巴拉圭喺8強12碼射贏巴西，表面上好犀利，實情場波疑點重重，上半場有羅賓奴入波後，成個下半場縮後任巴拉圭去攻，眼見巴拉圭咬唔入，射親唔係出界就冇力，堤亞高施華就伸隻手出嚟打排球，真係唔靠12碼都輸唔番。結果一如巴西所願又互射12碼決勝，極刑巴西連續射飛機，呢場波咁有誠意，巴拉圭出線都實至明歸。

阿根廷已有準備

事實上，巴拉圭喺分組賽至今，實實在在只贏過一場，仲要係贏牙買加1:0，實力有幾高大家心中有數，當然亦可以講，佢哋喺分組賽已經遇上阿根廷，當時仲以2:2迫和對手，但記得嗰場波有阿根廷先以2:0開紀錄，繼而下半場阿根廷輕敵先至輸番，有過一次教訓阿根廷點會唔識醒，應該唔會再歷史重演。

巴拉圭防線太老

阿根廷坐擁多名星級箭頭，但分組賽至今入球數字唔理想，美斯及阿古路分別只有1球及2球進帳，有人歸咎於美斯打國家隊表現始終不及巴塞，不過如果真係有親身睇幾場阿根廷發揮，就會發現問題肯定不在美斯身上，而係前線多個球員擺位上都太死板，後上支援亦慢，美斯控波冇幾多球身邊會有人作短距離支援，變相前線阿古路都少供應，而迪馬利亞每每左路有波都直接傳中，反而扼殺咗阿古路同美斯嘅優勢，阿根廷的確有需要檢討一下進攻戰術。
雖然馬天奴都仍在摸索階段，但阿根廷就算單靠球員個人能力，都足以摧毀巴拉圭防線，而且計埋防守能力，阿根廷亦到抵受到巴拉圭幾個老將來犯，計多項死數，阿根廷比起巴拉圭足足多一日休息，咁都贏唔到點對得住江東父老。