智利和局「秘」而不宣

智利和局「秘」而不宣

美洲盃4強先由智利大戰秘魯！智利分組賽表現出霸氣，不過上一圈喺打多2人下只小勝烏拉圭，似乎表現稍令人失望，而秘魯於8強大勝玻利維亞3:1，當中古里路大演帽子戲法大有機會問鼎神射手獎座，今場未必一面倒智利贏硬， 90分鐘開出和局機會甚大。（周一2，now681台周二7:30am直播）

智利分組賽2勝1和，最後一場大炒玻利維亞5:0，都令人覺得呢隊智利肯定係奪標熱門之一，不過細心留意，一來過去幾個主辦國冇幾多成功奪標，二來智利分組賽對手肯定係3組入面最弱，除玻利維亞外，半力出擊嘅墨西哥，以及有主力缺陣嘅厄瓜多爾，智利都只係取1勝1和，結果強勢殺到入8強，面對只識守冇8攻力嘅烏拉圭，上半場咬唔入，到下半場打多1人至僅勝1:0，已經反映出智利打有實力嘅球隊其實唔算高好多，還好呢邊線完全冇阿根廷、巴西以及哥倫比亞，否則智利可能更早受到考驗。

古里路信心大增

事實上，秘魯喺晉級過程就艱辛好多，佢哋首仗一度領先巴西，雖然最後輸1:2但已經贏盡掌聲，尤其分組賽最後一場如何嚴防哥倫比亞，加雷卡取得分組階段最佳教練絕對實至名歸。
而秘魯到淘汰階段終於輕鬆多少，以3:1大破玻利維亞，輕鬆程度不下智利大勝那場，當中古里路嘅帽子戲法，雖然有兩球都多得對方送禮，但對於呢個射手信心上肯定有重大幫助，而今場佢哋一致被睇淡下，壓力就更加大減，死守智利悶和90分鐘絕不為奇，隨時智利壓得太上就被古里路及法芬偷襲得手，千萬唔好以為智利呢場一定贏硬先！