巴西晉級實至名「圭」

巴西晉級實至名「圭」

美洲國家盃8強最後一戰：巴西將會遇上巴拉圭挑戰，巴西肯定續有尼馬停賽，而佢哋似乎都已經冇就上訴存任何希望，因為尼馬都已經離隊回到老家休息，不過上仗見佢哋缺尼馬下攻力未有太大影響，而巴拉圭續靠幾個老將撐場，但分組賽只贏過大魚腩牙買加，球隊防守力亦一般，睇怕都阻唔到巴西殺入4強。（周六19，now681台周日5:30am直播）

巴拉圭能夠殺入次圈賽事，已經爆出極大冷門，除咗多得阿根廷首仗輕敵送咗1分俾佢哋外，更要多得同組仲有隊牙買加，以及缺蘇亞雷斯嘅烏拉圭，幾個運氣因素加埋令到佢哋出線8強。
事實上，巴拉圭喺過去世界盃外圍賽已經喺南美賽區包尾，隊中主力都仍然係巴里奧斯同希度華迪斯，青黃不接問題非常嚴重，而經過密集嘅分組賽後，呢班老鬼身心俱疲，要繼續出現奇跡似乎不太可能。
巴西喺今屆賽事所表現出嘅鬥志，似乎係有心同智利爭一日長短，不過好衰唔衰，分組賽又撞上剋星哥倫比亞，世界盃時兩強相遇，當時哥倫比亞整傷尼馬亦令堤亞高施華停賽，結果巴西4強大敗俾德國，而到美洲國家盃，又令到尼馬紅牌停賽4場，雖然話就話足球係團體運動，但關鍵時刻有冇尼馬好重要，嚟緊如果巴西出線都係爭啲霸氣。
不過，4強嘅事都係打後再講，巴西今場續有剛轉投利物浦嘅費明奴掛帥，此子上場攻入1球，而防線亦冇人傷停，就算唔可以大炒巴拉圭，都至少唔會輸到好似打德國時咁慘，鄧加帶隊向來以目標為本，睇佢哋上場贏委內瑞拉，入2球後縮後輸番粒，唔求悅目只求結果，睇嚟呢場會歷史重演，巴西隨時又係1球貨仔入4強。