美國女足一擊即「中」

美國女足一擊即「中」

換轉係其他場合見到「中美對碰」梗係要愛國啦，不過足球場係弱肉強食嘅英雄地，中國女足遇到奪標熱門美國女足，能夠入到嚟女子世界盃8強已經要收貨啦。（周五3，香港時間周六7:30am開賽）

真係要畀個「Like」畀中國女足，喺分組賽爆個半冷門壓過荷蘭女足以次名身份出線，去到16強面對住體力充沛嘅喀麥隆女足不落下風，仲要由頭帶到落尾而贏，睇得出呢班娘子軍比過去幾屆女子世界盃都有進步，尤其係以龍門王飛帶領嘅一班後防球員踢得唔錯，可惜抽正一支下下籤，嚟到8強就要面對冠軍熱門美國女足，否則應該可以走得更遠。
人腳鼎盛嘅美國女足無論前中後三線都大超中國女足，唯一要小心嘅係今屆佢哋嘅進攻能力偏弱，僅得首戰能夠贏波贏盤，連場都要靠有傷在身嘅雅歷絲摩根幫手入波，雖然殺入4強係意料中事，但係面對住玩慣「防反」嘅中國女足小心又會贏波輸盤，熱熱哋揀個齋W算啦。