哥倫比亞連「根」拔起

哥倫比亞連「根」拔起

美洲盃明早上演本屆其中一場重頭戲，由阿根廷大戰哥倫比亞！阿根廷分組賽2勝1和，不過表現毫無霸氣，中前場冇組織亦配合唔到美斯發揮，而哥倫比亞情況相若，中前場完全各自為政，呢場星味十足嘅球賽實際上可觀性一般，甚有可能一球上落，係都要估勝負嘅話，哥倫比亞喺前場壓迫方面做得好，分組賽又曾擊敗巴西，信佢哋有爆冷機會。（周五2，now681台周六7:30am直播）

阿根廷球星一大籮，不過過去幾任教頭都完全磨合唔到隊波，前線除咗「同室密友」阿古路及美斯有啲默契外，其餘球員都係各顧各自己打自己，迪馬利亞係好波不過多數自己死去，希古恩打強隊例隱形，泰維斯勤力有餘技術一般，中場中路位置班尼加比起一眾隊友有啲唔夠班感覺，柏斯托尼又係喜歡自己引球推進嗰種，總之成隊波一砌埋真係冇隊形。
從三場分組賽所見，美斯一攞波上腳，附近5碼範圍多數冇隊友支援，攻勢就只有喺禁區外圍猜來猜去入唔到肉，面對完全冇攻力嘅牙買加都贏得辛苦就已經印證到呢個事實。

阿根廷各自為政

當然哥倫比亞都唔好得去邊，佢哋分組賽只係入過1球，負負碌碌至以小組第三名出線，當中法卡奧明顯唔係缺態，而係冇波到腳。哥倫比亞中前場完全組織唔到攻勢，甚至交出致命傳送到法卡奧腳下，所以唔單止係法卡奧，連巴卡、馬天尼斯都冇咩起腳機會。

哥國遇強隊啱踢

咁責任喺占士仔度？又唔關事，佢向來似輔鋒多過啲創造型中場，而且經過一個世界盃多咗人防範佢，而佢又有死左腳呢個弱點，分組賽三場波都冇試過面向龍門舒舒服服咁交個一個靚波，所以哥倫比亞打弱隊咬唔入，反而面對巴西時專心打前場緊迫之下，反而打出分組賽最好一仗，呢隊哥倫比亞遇強愈強，贏埋阿根廷又有咩出奇。