智利小勝實至名「圭」

智利小勝實至名「圭」

美洲盃踏入8強階段！主辦國智利鬥志相當鮮明，小組賽3戰2勝1和狂轟10個入球，上仗贏玻利維亞，打至中場時間更有換走山齊士同維達爾嘅能耐，睇嚟智利的確有可能打入賽事決賽，烏拉圭缺蘇亞雷斯下攻力實在非常一般，分組賽3戰僅入2球，呢場面對住智利狂攻攻猛打，守得一時都守唔足一場，信智利埋單贏1球晉身4強。（周三10，now台681周四7:30am直播）

烏拉圭今次打呢屆美洲盃都有啲玩票性質，主力陣容除缺蘇亞雷斯，亦有加斯頓拉美利斯缺陣，前線卡雲尼喺3場分組賽冇腳好波，咁都打得入8強真係多得賽制有最佳第3名呢個席位，不過咁又唔好睇得烏拉圭咁死，前線佢哋冇板斧，防線有高甸拍占文尼斯，仍然有一線水準，如果立下決心死守，就算搵隊巴塞嚟都要攻一排至入到波，所以今場應該唔會有一面倒嘅比數出現。

智利受嚴重霧霾影響

智利由分組賽至決賽，都會喺同一個球場進行，真真正正有主場之利，不過聖地牙哥地區近日天氣突變，當地受嚴重霧霾影響，政府已頒令要求民眾唔好外出，當地空氣更加被批為不適合外間活動，咁嘅空氣質素肯定唔適合進行一場90分鐘，甚至一場120分鐘賽事，未知會唔會影響賽事進行。

頭75分鐘成勝負關鍵

不過，比賽如果真係打得成，睇怕差劣空氣質素一定對球員體能構成影響，部份球員可能打至下半場已呼吸困難，睇嚟頭75分鐘賽事已經夠分勝負，咁講到底智利球員對於自己國家天氣點都適應多啲，上場阿歷士山齊士及維達爾又有充分休息，體能狀態會喺烏拉圭之上，睇好智利攻到下半場早段會咬得入，尾段烏拉圭亦反撲無力，一球上落就非常合理。