阿根廷半主剝牙

阿根廷半主剝牙

美洲盃B組最後一輪賽事，阿根廷上場贏烏拉圭後壓力大減，呢場對同組最弱之牙買加將可放鬆心情狂攻，基於雙圭大戰在前，如果烏拉圭贏波阿根廷冇必要大勝，反而巴拉圭贏因要計得失球爭首名，只好算牙買加唔好彩，不過形勢上改變唔到阿根廷要贏波結果，信佢哋半場前已奠定勝局。（周六21，now681台周日5:30am直播）

牙買加識守唔識攻，今次大賽首兩場都只係一球僅負，防線上馬里亞柏同韋斯摩根分別效力水晶宮及李斯特城，級數上有保證，不過前線人腳可能只有英乙級數，頭兩戰成隊加埋得一腳中龍埋門，除非阿根廷又好似首戰咁入完波輕敵，否則牙買加都九成係三零部隊出局。
事實上，就算牙買加呢場爆冷贏波，佢哋都冇可能追上呢組頭兩名位置，而另外兩組嘅最佳第3名睇嚟至少都有4分，所以牙買加見博嚟都冇用，呢場隨時出隊副選練兵就算。

牙買加隨時出副選

所以呢場唯一問題係，阿根廷究竟埋單可以贏幾多球呢？如果正正常常阿根廷出「夫添」，而又由頭攻到尾嘅話，睇怕贏3、4球應該唔少得，不過今場馬天奴見對手易食，應該唔會派膊頭有微傷嘅阿古路出場，變相希古恩及泰維斯有機會以正選披甲，而後者打強隊受唔起壓力，打弱隊就開正佢嗰範。

阿根廷適應巴塞陣式

而如果馬天奴正選出希古恩，應該上半場已經有2至3個入球，而美斯打頭2戰只係入咗個12碼，呢場應該會走多兩步搵下波入，而且馬天奴刻意用上巴塞陣式將就美斯發揮，其他球員已經開始習慣，當中迪馬利亞一連兩場有好表現，薩巴列達都知道咩時間後上支援美斯至最啱，睇嚟阿根廷今仗會打出3場以來最佳表現，全場大炒機會大，睇嚟半場都至少贏2粒。