墨西哥可「爾」贏番場

墨西哥可「爾」贏番場
 
呢一屆美洲國家盃係咁爆冷，不過嚟到關鍵時刻就想唔認真都唔得啦，依家墨西哥正正就係處於出局邊緣，喺A組煞科戰又點會咁輕易就放過厄瓜多爾先？（周五3，now681台周六7:30am直播）

想知道墨西哥會唔會留力絕對唔使估估吓，睇番佢哋目前A組只係攞住2分，呢一場波唔好話輸，就算係和波都好有機會出局；冇錯美洲國家盃係計埋分組最佳第三名，不過要留意墨西哥一旦和波，而C組嘅哥倫比亞又或者係秘魯一旦喺最後一戰大炒對手攞晒3分嘅話，咁樣佢哋就會輸得失差搞到出局，左計右計好似冇乜本錢玩放水喎。
特別係要留意今屆墨西哥故意揀埋唔少效力本地聯賽嘅球員入隊，「小豆」、杜斯山度士，同埋龍門奧祖亞都唔喺度，外流球員得番馬體會前鋒魯爾占美尼斯、維拉利爾中場查維亞阿基路，同埋川迪嘅捷西斯哥朗拿，不過實在唔敢睇得佢哋太低，因為教練米基爾希亞拉喺上年世界盃帶領國家隊逃出死亡之組後出晒名，如果嚟到美洲國家盃就分組出局就等於拆自己招牌，遇到同組最弱嘅厄瓜多爾係時候出真功夫！