秘魯開齋「委」以重任

秘魯開齋「委」以重任

美洲國家盃C組賽事，兩支黑馬秘魯同埋委內瑞拉喺首輪都有驚喜演出，今次碰頭必有火花，但係考慮到秘魯仲未見底，加上對賽往績佔優，故足智彩開平手盤，睇好秘魯贏波「拉」頭馬。（周四3，now681台周五7:30am直播）

雖然秘魯首輪不敵巴西1:2，但係教練加雷卡仍然讚賞球隊表現，畢竟對手係實力強大嘅森巴兵團，兩隊大部份時間都打和，只係末段失守輸波，坦白講已經係超額完成，冇人會怪佢哋。效力史浩克04嘅翼鋒法芬上仗表現搶鏡，教練加雷卡已經講到明會繼續搵佢做重心人物，而祖安華加斯同埋阿斯古斯就只係輕傷，即使無法擔正，仍然有機會進入大名單，故此陣容尚算完整。

首仗僅負巴西搶鏡

最重要係秘魯喺2011年美洲國家盃季軍戰曾經以4:1擊敗委內瑞拉，而喺總對賽成績方面，兩軍30次交手，秘魯贏咗19次，換言之有超過三份二嘅贏面，格食格味道都幾濃。
委內瑞拉首輪以1:0擊敗哥倫比亞，賽果方面當然驚喜，不過要留意哥倫比亞大大失準，特別係主力射手法卡奧喺球場上如同隱形人，故此委內瑞拉爆冷多少有啲外來因素，唔使睇得太高。坦白講，委軍防守係夠晒硬淨，不過攻擊力始終一般，當中部份球員更加喺三、四線聯賽搵食，例如後衛圖尼斯踢緊泰國聯賽、正選門將丹尼靴南迪斯就踢緊西班牙乙組，10號仔朗奴華加斯亦只係踢希臘AEK雅典，牌面上的確未夠班，所以足智彩開出平手盤，秘魯無論點計都係坐走望贏。