葡萄牙回勇贏面「大」

葡萄牙回勇贏面「大」 
 
下季皇馬就會改由賓尼迪斯執教，C朗仲有冇得做大佬都仲係未知之數，不過最緊要都係做好咗份內事先，如果佢可以率領葡萄牙喺國際賽擊敗正喺轉接期嘅意大利，賓帥想郁佢都冇任何藉口啦。（周二3，香港時間周三2:30am開賽）

係人都知道C朗同皇馬隊友加夫里巴利不和，點知有消息話賓尼迪斯專程去咗睇威爾斯嘅歐國盃外圍賽，難免會令人聯想到C朗將會失寵；不過點都好啦，只要C朗今晚能夠率領一班部下，漂漂亮亮咁打敗意大利嘅話，相信佢喺皇馬嘅地位亦冇咁易就動搖到。
剛剛喺歐國盃外圍賽分組賽以3:2力克阿美尼亞嘅葡萄牙，預期都係派出熟口熟面嘅陣容迎戰意大利，C朗自然係今晚主角，另外嘅拿尼、莫天奴等球星相信都唔使多介紹嘞。要留意就留意對手意大利正值轉接期，近期唔再搵「巴神」入隊，而中場派路亦好耐冇踢過國家隊嘞，換言之佢哋將2012年歐國盃嘅入波方程式完全放棄晒，可惜無論係恩莫比利、艾沙拉維，定係修咸頓嘅加斯安奴柏利呢三個人踢國家隊都冇乜料到，撐吓「C朗BB」幫葡萄牙建功好過。