阿根廷小勝眾望所「圭」

阿根廷小勝眾望所「圭」 

今屆美洲盃頭一輪真係爆冷連場；阿根廷首戰領先2球之下竟然被巴拉圭迫和，餘下兩戰不容再失，而烏拉圭首戰都只係小勝牙買加一球，不過既有3分在手，呢場目標更清晰以1分為先，而第一場見佢哋缺幾個進攻主力下的確冇咩火力，睇嚟阿根廷今場圍攻下可以喺下半場入到波小勝1球。（周二7，now681台周三7:30am直播）

烏拉圭首戰面對同組弱旅牙買加，一如所料只能小勝1粒，全因中前場缺蘇亞雷斯及加斯頓拉美利斯影響極大，而代替蘇九之路蘭級數上明顯差幾截，烏拉圭要重溫上屆好夢並唔容易，而事實上，烏拉圭上場唔失波，並唔係係佢哋守得特別好，而係對方牙買加全場十幾射完全冇中過龍，所以真正考驗佢哋防線嘅肯定係今場，當然以高甸、占文尼斯等馬體會球員會熟識美斯打法，但前線攻不銳，防線久守必失，睇嚟佢哋最多頂得住個上半場。

阿根廷攻力冇問題

阿根廷攻力上完全冇問題，上場阿古路一來夠機警，二來都見到佢狀態不俗，美斯喺中場派牌亦冇問題，係處理一個半單刀似乎冇咗喺巴塞份鬆容，而迪馬利亞回到邊路位置直頭翻生，阿根廷呢個前線組合的確犀利。

美斯今場出真功夫

只係防線方面真係太唔集中，輸兩球一來後衛有問題，但如門將夠級數至少第二球可能唔使輸，希望經過第一場後馬天奴會鬧醒班球員，而美斯上場賽後都少有咁多嘢講，佢話下半球隊完全失去控制力，佢哋應該更多攞個波嚟用，而唔係將控球權交俾對方，睇嚟美斯今場一定會出功夫，各位阿根廷Fans應該可以有啲期望。不過形勢上烏拉圭肯定以1分做目標，阿根廷要咬得入都可能要啲時間，下半場定勝局就非常合理。