中國女足耳目一「新」

中國女足耳目一「新」

中國女足喺1999年攞過一次亞軍之後就一蹶不振，不過嚟到今屆終於經歷番一次「小陽春」，只要今晚喺A組對住新西蘭女足攞番3分就肯定出線16強！（周一6，香港時間周二7:30pm開賽）

冇錯女子世界盃係會計埋分組最佳第3名，目前喺A組手握3分嘅中國女足即使係和波，都有機會晉身16強，不過為免夜長夢多，有得贏冇理由唔贏埋落去；其實新西蘭女足喺分組先不敵荷蘭女足，再同加拿大女足互交白卷，到呢一刻都仲未入到1球波就反映出佢哋嘅實力係A組最弱，中國女足咁都唔好好把握，贏番場漂漂亮亮嘅勝仗實在係對唔住13億人民對佢哋嘅支持。固然平均年齡仲未夠24歲嘅中國女足心態仲係好嫩，不過一場踢得比一場好亦都係事實，雖然未知道門將王飛能唔能夠趕及上陣，但係睇番佢哋上場對住荷蘭女足全場有成27次攻門咁多，今晚保持住呢個攻門次數肯定嚇死新西蘭女足。