厄瓜多爾好「玻」連場

厄瓜多爾好「玻」連場 

冇錯厄瓜多爾喺舊年先至出席過世界盃，不過佢哋喺美洲國家盃嘅成績可以話係完全唔見得人，好彩今次遇到同組最弱嘅玻利維亞，係打破保持咗11年咁耐嘅「不勝紀錄」嘅黃金機會！（周一3，now681台周三5:00am直播）

厄瓜多爾有11年未贏過波？唔係話佢哋喺呢段時間未贏過一場國際賽事，而係佢哋喺過去三屆美洲國家盃都係「捧蛋」而回，一場波都未贏波，而呢個紀錄已經保持咗整整11年咁耐嘞！經歷過舊年嘅世界盃之後，厄瓜多爾炒咗魯達，今年初改由艾美歷克嘅昆達羅斯領軍，只要有留意開南美波就知道艾美歷克係自由盃嘅常客，管理層咁做無非都係想呢個「不勝魔咒」能夠盡快被打破啫。
其實只要厄瓜多爾能夠用到「夫添」，根本就唔使擔心會喺分組贏唔到波，可惜曼聯嘅路爾斯華倫西亞已經攞咗假做手術，好衰唔衰今季喺愛斯賓奴踢到曉飛嘅卡些度就喺季尾受傷，搞到前線得番韋斯咸嘅安拿華倫西亞一個人支撐大局，所以上場對住擁有巴塞鋼龍哥迪奧巴禾、阿歷斯山齊士等球星嘅主辦國智利自然係冇得踢啦，不過對番A組最弱嘅玻利維亞就唔同講法，咁都攞唔到3分就冇得怪人，係驚佢哋淨係靠安拿華倫西亞會少勝對手。