智利主場枕「哥」待旦

智利主場枕「哥」待旦
 
美洲國家盃去到第2輪分組賽賽事，其中主辦國智利首戰贏厄瓜多爾演出對辦，再出遇上接近以全土炮上陣，首戰亦只能僅和玻利維亞嘅墨西哥，預料可以再度輕勝一場，讓球盤讓1球可以照捧。（周一4，now681台周二7:30am直播）

唔知係青訓做得好定時來運到啦，總之智利近年有多名具質素球星湧現，呢批球員更有力喺歐洲強隊立足，例如阿仙奴翼鋒阿歷斯山齊士、巴塞門神哥迪奧巴禾以及國際米蘭中場加利美度等，當然唔少得今屆帶領祖雲達斯殺入歐聯決賽嘅中場維達爾啦；講真智利揸住呢套陣容，莫講話要喺分組賽出線，要喺主場爭冠軍都絕對唔係冇可能，能否成事就要睇佢哋之後造化嘞。

墨西哥首戰唔對路

事實智利首場分組賽亦爭氣喎，佢哋喺開幕戰以2:0輕取厄瓜多爾，維達爾同昆士柏流浪前鋒伊度亞度華加斯都有「士哥」，難怪主帥森柏奧利都話滿意球隊表現；至於陣容方面，智利唯一唔出得係馬迪亞斯費南迪斯，因為佢要坐波監，但佐治華迪維亞絕對有力頂替其空缺，加埋其他位置都可「夫添」上陣，智利再下一城機會好高。
墨西哥今夏兵分兩路，以接近全土炮打美洲盃，另可能以強陣出戰美洲金盃；只係教頭米基爾靴里拉可能計錯數，事關佢哋首戰遇上冇高原主場之利嘅玻利維亞，竟然只能以1:1僅和對手痛失2分，賽後更受到本土猛烈評擊，球隊內部士氣只係麻麻；此外，可以穩定軍心嘅老將馬基斯上場受傷離場，今場更要通過體測先可以上陣，如果冇埋佢幫手領軍，墨西哥分分鐘輸得更加慘烈。