烏拉圭小勝「買」得過

烏拉圭小勝「買」得過 
   
美洲盃B組早場賽事由烏拉圭對牙買加；牙買加肯定係三大魚腩之一，不過呢舊魚腩邊個食係有分別，烏拉圭今次大賽冇蘇亞雷斯，亦冇科蘭，前線可靠嘅得個卡雲尼，而中場又缺加斯頓拉美利斯，後防亦唔穩陣，魚腩中隨時啃骨，不過佢哋整體實力肯定喺牙買加之上，小勝機會相當高，一於冷吼「讓和」。（周六11，now681台周日3:00am直播）

牙買加雖然實力平平，不過近年係有顯著進步，前年世界盃外圍賽擊敗美國已經證明到，不過問題係，佢哋陣中星級球員的確有限，其中多名喺英國搵食球員，前線有西蒙戴堅斯、博奇利等，都只係一般英冠球員，真係計上嚟防線穩好多，馬里亞柏同韋斯摩根，兩人分別都係今季水晶宮同李斯特城護級功臣，所以呢隊牙買加明顯係支守強攻弱嘅球隊，今場唔會咁容易俾烏拉圭咬得入。

烏拉圭鋒力欠銳

烏拉圭今次大賽靠晒卡雲尼擔大旗，中場缺加斯頓拉美利斯下，可能用上新星迪阿拉斯卡達打正選，不過此子今季喺高士路未出過場，狀態去到邊都未知，而防線亦冇埋老將盧根奴下，明顯烏拉圭係想借今次賽事換血，所以即使對手弱，烏拉圭贏一粒已合格有餘。