阿根廷半大實至名「圭」

阿根廷半大實至名「圭」 

美洲國家盃大熱阿根廷強勢出場！阿根廷坐擁美斯、阿古路、泰維斯鋒線，要入波本來已經唔難，何況今次陣容上防守球員級數十足，成為賽事大熱當之無愧，對手巴拉圭久沉兼青黃不接，阿根廷隨時一個半場已經大炒對手，下半場就可以適量留力，睇嚟半場開大比數機會甚大。（周六17，now681台周日5:30am直播）

巴拉圭喺上屆世盃外圍賽16戰只贏3場敬陪末席，隊內完全缺乏新人接班，今次大軍名單仍然有多名響噹噹老將，當中包括巴里奧斯、希度華迪斯同辛達告魯斯，但佢哋喺本身球會都正選難保，而中後場更係慘不忍睹，幾乎完全冇有級數嘅外流球員在陣，如果數今屆賽事三大魚腩，呢隊巴拉圭一定榜上有名，而首戰就對正大熱門阿根廷，都只有望輸少當贏。

阿根廷上場友賽大勝

阿根廷失意世盃，上次大軍名單唔選泰維斯整個柏拉斯奧入去都係自己抵死，不過馬天奴上任後真係成隊正常晒，泰維斯重新入選之餘，美斯同呢個教練關係亦好，阿根廷近3場友賽都贏晒，當中上場贏玻利維亞阿古路更大演帽子戲法，如果世盃今年至搞阿根廷機會就大好多，不過已經多年冇大賽冠軍，呢次美洲盃都肯定去盡。

巴拉圭難有起腳機會

事實上，阿根廷今次陣容的確攻守兼備，前線中腳唔在講，中場有迪馬利亞、班尼加，馬斯查蘭奴因應防線夠晒人可以打番最啱打嘅防中，巴拉圭今場應該中場線都過唔到，防守上加雷搭奧達文迪，係阿根廷過去10年最穩陣中堅配搭，一對曼市閘位盧祖及薩巴列達都有級數，唯龍門位置有啲挑剔，不過等對手起到腳至再算啦！睇落阿根廷真係有啲大軍壓境味道，呢場贏兩三粒不在話下，睇嚟上半場更已經打到對方冇還手之力。