智利主勝「爾」成定局

智利主勝「爾」成定局

今夏其中一個重頭戲美洲國家盃將於明早開波，主辦國智利非常重視今次盃賽，所有精兵悉數入選，而厄瓜多爾有多名星級球員有傷不在陣，教頭名氣大都未必有幫助，不過此類揭幕戰大家都未上力，多數一球起兩球止，信主隊可以借主場之利小勝1球。（周四10，now681台周五7:30am直播）

分組賽第一戰都係摸底性質比較濃厚，先睇吓智利陣容，大名氣球員如阿歷斯山齊士、維達爾、伊度亞度華加斯、大衛比沙路、佐治華迪維亞、伊斯拿及哥迪奧巴禾全部有入選，可以話係對今屆賽事志在必得，當中哥迪奧巴禾連巴塞三冠王祝捷會都缺席，更睇到佢對今次盃賽嘅重視。
事實上，智利喺上屆世盃後熱身賽表現只係一般，近8戰4勝3負1和，問題在於近3場波只係入過1球，仲要係對弱旅薩爾瓦多攻入，阿歷斯山齊士喺阿仙奴辛苦咗一季有冇足夠狀態帶起鋒線，實在係今屆賽事智利攞到咩成績嘅關鍵。

厄軍倚重小將

雖然智利未必夠銳，不過厄瓜多爾仲慘，效力曼聯嘅華倫西亞因傷冇入選，射手安拿華倫西亞今場有傷都可能唔打得，今次陣內亦較多90後球員，似乎新教頭昆達路斯都有意打造一支全新嘅厄瓜多爾，不過既然係咁，佢哋今次大賽戰意非常成疑，而且同組仲有勁旅墨西哥，厄瓜多爾面對同組實力最強智利，目標肯定係守和博1分，三戰望有5分以小組第3名或第2名出線就夠，呢場肯定會縮後任智利攻，呢場入球唔多已成定局，睇好智利借主辦國優勢，以1:0小勝對手打開勝門。