法國女足有型有「格」

法國女足有型有「格」

唔只英格蘭每逢去到大賽都會腳軟，其實英格蘭女足亦都係「悲情女主角」，遇到夾慣夾熟嘅老對手法國女足唔好話打和，能夠輸少幾球已經要當贏！（周二1，香港時間周三1:00am開賽）
其實英格蘭女足目前嘅世界排名能夠打入前6，絕對係今屆女子世界盃嘅黑馬，問題係佢哋揀咗新人入隊，代表國家隊超過50次嘅女球員僅得9個女球員咁大把，真係好懷疑佢哋今次參賽係為咗練兵；反而法國女足淨係代表國家隊超過100次嘅女球員就已經有7個咁多，仲未計其他球員，淨係嗰份默契都已經贏晒。
不過唔夠經驗都唔係好致命，冇乜大賽命就真係好麻煩！上屆女子世界盃英格蘭女足喺分組賽事曾經贏過該屆盟主日本，不過去到8強正正就係因為射輸12碼搞到不敵今晚嘅對手法國女足出局，同男子隊一樣去到大賽就會失準，今次人腳冇上次咁勁，唔好話有能力復仇，喺呢場F組賽事輸少幾球已經要收貨。