巴西女足耍“太極”

巴西女足耍“太極”

    早兩日睇到“賈兄”寫咗篇“喜見女足現身工人賽”，雖然參賽球隊只得四隊，但總算係個好開始，始終萬事起頭難，希望有關團體及機構可以繼續大力支持。

    適逢四年一度嘅女足世界盃剛在加拿大展開，相信對於初起步的澳門女子足球發展，亦能起到一定推動作用。講開今屆女足世界盃，國家隊在揭幕戰對住主辦國加拿大，的確輸得唔服氣，在補時輸個“無厘頭”十二碼，國家隊根本唔係輸畀加拿大，而係輸畀負責執法嘅烏克蘭女球證，呢啲真係叫做東道主優勢。無論如何，希望中國姑娘能夠化悲憤為力量，在最後兩場小組賽踢爭氣波，躋身十六強。

    至於明早繼續有分組賽進行，第一屆女足世界盃亞軍巴西將會出場，對住亞洲嘅韓國，巴西由女球王馬達領軍，再配合經驗十足嘅基絲迪安妮，兩位都係現今女足球壇知名人物，足以帶起球隊在今屆有一番作為。

    韓國女足實力亦不簡單，但對住巴西始終輸大賽經驗，初盤巴西讓一球，捧森巴女郎可以戰勝太極老虎乸。

    推介：巴西2:0