美國女足破釜沉「洲」

美國女足破釜沉「洲」
 
美國男足唔爭氣，不過女足就幾有冠軍相喎；冇錯美國女足對上一次贏得女子世界盃，已經要數到去16年前咁耐，不過今屆絕對係其中一隊奪冠黑馬！（周一6，香港時間周二7:30am開賽）

唔好忘記今屆女子世界盃係喺加拿大舉行，美國女足點都算做有半個主場之利，雖然佢哋由1999年贏得冠軍之後就無以為繼，但係目前嘅世界排名排到次席就證明到實力唔錯，累積9戰不敗嘅戰績亦好夠說服力。反而澳洲女足喺上季入過8強，點知近年嘅世界排名跌到落第10位就有明顯退步，一來一回要捧美國女足喺呢場D組首戰旗開得勝。
至於上屆女子世界盃冠軍日本女足就會喺C組首戰面對住瑞士女足，相信佢哋有能力3戰全勝取得9分晉級，事關同組嘅瑞士女足、喀麥隆女足，甚至係厄瓜多爾女足通通都係首次參加女子世界盃嘅新丁，經驗豐富嘅日本女足可以喺C組扮吓大家姐。（周一7，香港時間周二10:00am開賽）