阿根廷U20捧「大」

阿根廷U20捧「大」

世青大熱阿根廷面臨出局，今場非勝不可！世青盃分組賽B組最後一輪賽事，賽前大熱阿根廷兩戰僅得1分，今場一定要擊敗奧地利至可以出線，不過奧地利肯定係今屆賽事黑馬，球隊打落整體性十足，上場小勝巴拿馬亦只係冇運，阿根廷攻強守弱尤其門將位置有極大漏洞，呢場九成九有失波，睇嚟又係一場非常悅目嘅入球騷。（周五1，香港時間周五12:00pm開賽）

奧地利首兩戰取下一勝一和，可能都有啲喜出望外，不過佢哋有能力摸和世青常客加納，已經證明有一定實力。奧地利陣中未見有超級新星，一套非常整體嘅打法令人印象深刻，當中後防有效力史特加嘅路華歷，中場亦有奧格斯堡嘅祖柏治，級數上一啲都唔輸蝕，而頭兩場最耀眼嘅就有門將卡沙利，雖然兩場波佢都有失球，不過呢位門將反應好快，肯定成為阿根廷入球最大阻礙。
阿根廷係世青奪標最多球隊，更挾南美青年錦標冠軍身份進軍呢個盃賽，所以賽前已經成為絕對熱門，只係球隊喺頭兩戰防守上嚴重犯錯，首戰對實力平平嘅巴拿馬竟然喺布越位上犯錯，第二場對加納更失3球在先，當中門將巴達拿肯定係罪魁禍首，呢個門將近柱又失位，高波又跳唔起，更有一球喺手底漏入，加埋不本不穩嘅防線兩場失咗5球，教練哥朗東拿呢場真係有必要試下換人。不過前線阿根廷又的確極之可靠，隊長安祖哥利亞上季加盟馬體會雖然未落過場，但一早已有「新阿古路」美譽，首戰唔係靠佢入兩粒，球隊一早出埋局。而馬體會教練施蒙尼個仔基奧雲尼施蒙尼上場亦有進帳，加埋馬天尼斯呢隊阿根廷根本冇可能冇入球出現，今場唔敢估佢哋一定贏，但入三兩球肯定難唔到佢哋。

加納U20爭首名去「馬」

至於同組另一場都係生死戰，加納賽前已手執4分，今場贏和都一定出線，不過佢哋打先都冇得諗走線問題，所以對住巴拿馬應該唔會留手，巴拿馬唔只要贏仲要贏得夠多，但上場兩主力領紅停賽，應該都阻唔到非洲黑星贏埋首名出線。（周五2，香港時間周五12:00pm開賽）