富明尼斯主場殺「迪」

富明尼斯主場殺「迪」 
 
唔經唔覺富明尼斯已經有成三個月咁耐喺主場冇輸過，再睇埋佢哋喺上輪巴甲作客踢少個都頂得住法林明高就明白到點解佢哋會咁強勢，今次有埋主場撐腰梗係唔會怕哥列迪巴！（周四10，香港時間周五3:00am開賽）
睇番富明尼斯由早前嘅巴省聯到依家踢緊嘅巴甲，由3月頭開始計起足足有成8場都未輸過，不過唔好以為佢哋單憑主場威力撐腰先有咁嘅主場成績，實際上老牌前鋒費特喺季初就立即交到功課，再搭多件係人都識嘅孔卡都咪話唔得人驚，特別係要留意佢哋上場巴甲作客實力唔錯嘅法林明高竟然可以由頭贏到落尾，甚至去到比賽中段踢少個都贏到波，睇嚟唔只識攻咁簡單，若果要防守亦唔會甩拖，似乎喺季初已經有晒作戰準備。
當然主場唔識都唔代表可以贏到，問題係作客嘅哥列迪巴好似完全冇準備過就開季咁，揭幕戰作客不敵查比高恩斯都仲可以賴係作客要打番些少折扣，亦可以話係唔小心，不過上輪巴甲喺主場有晒天時、地利、人和都可以輸俾名不經傳嘅艾華爾就真係唔可以原諒，睇嚟佢哋仲有排頹，好難相信會頂到富明尼斯嘅狂攻。