維拉利爾放心「吼」實

維拉利爾放心「吼」實

維拉利爾繼續佢哋嘅澳洲熱身賽之旅，上次贏波壯聲威之後，黃色潛艇又再接受布里斯班獅吼嘅挑戰，計實力依然係冇得打，故此唔使諗得咁複雜，一於力捧「讓客」，實行要毀「獅」滅跡。（周三5，有線64及203台周三5:00pm直播）

布里斯班獅吼上個月喺亞冠盃主場不敵日本球會浦和紅鑽之後，已經將近一個月冇進行正式比賽，而球會方面啱啱安排咗艾萊斯出任新教練，問題係今仗會先由看守教練法蘭費臣領軍，艾萊斯只會從旁觀戰，真係充滿實驗意味。獅吼首席射手軒歷基安達迪同埋後衛諾夫未都已傷癒，有望上陣一部份時間，不過門將迪奧列托斯因傷倦勤，無緣喺新帥面前表演，而前鋒卡路查奴域同埋中場沙路達就已離隊，睇嚟獅吼都係試人居多，呢場熱身賽勝負反而睇得好淡。
嚟自西甲嘅維拉利爾，上場熱身賽以3:2反勝阿德萊德聯，仲要喺落後兩球之下，上演一幕大逆轉，士氣同埋信心爆晒燈，更何況西甲都係踢完冇耐，黃色潛艇根本唔存在任何缺態問題，正路嚟講不勝無歸。

黃色潛艇人腳整齊

前鋒烏捷、後衛梅沙基奧同埋門將沙治奧阿辛祖因傷未有隨隊，不過從上仗所見，影響確實唔大，加上喺西甲煞科戰停賽嘅前鋒杜斯山度士同埋韋圖，可以喺呢兩場澳洲之旅中上陣，人腳算係齊整，包保唔會揸流攤，故此今戰即使讓波，亦可望開出「讓客」擊敗獅吼。