捧拿玻里一舉「素」得

捧拿玻里一舉「素」得 

今晚意甲煞科，基本上只係得番一場波有競爭性；就係拿玻里主場對拉素，拉素上星期貪勝不知輸，喺同市打吡2:1輸咗俾羅馬，由於意甲並唔係計得失球而係先計對賽，所以只要呢場煞科戰拿玻里擊敗拉素，就可以搶番個第3踢歐聯附加賽，拉素近期個氣勢有所回落，加上作客身份，有如一場過嘅決賽，啱晒即將離任嘅賓尼迪斯發揮。（周日31，無綫網絡電視301頻道周一2:45am直播）

拉素季中個勢好勁，一度試過連贏8場聯賽，最高試過殺上第2位，可惜呢個勢頭自聯賽不敵祖雲達斯後就被打破，近8戰佢哋只贏2場，當中意大利盃決賽再失利俾祖記，成班兵信心跌晒Watt，而老將高路斯已經5場冇波入，似乎體能上的確開始出現問題；而今場佢哋傷兵雖然唔算多，但大多集中在中場位置，簡拿、艾達臣及碧基亞原先都係中場主力，加埋作客因素的確不太樂觀。
拿玻里今季發揮都唔穩定，不過主場佢哋真係打高一班，對上9戰不敗之餘，對上4場聯賽主場全勝，雖然話班球員唔會特別為賓尼迪斯離隊而感觸，不過始終下一任主帥未明，球員有歐聯打始終想打，班球員戰意肯定夠，今場既冇新增傷兵，整體上絕對比拉素優勝。

肥賓擅打一場過比賽

形勢上，由於意甲同分乃以兩循環對賽成績作排名，首循環拉素主場輸0:1，現時佢哋比拿玻里多3分，今場至少要打和先可以保住第3，問題係拉素並唔係一支擅守球隊，作客同拿玻里對攻又好似自掘墳墓，呢場隨時搞到進退失據，賓尼迪斯以往離隊前，通常都唔會兩手空空咁走，睇吓今次可唔可以放低個歐聯位至加盟皇馬啦！