漢堡客場勝券在「厄」

漢堡客場勝券在「厄」
   
從來未試過喺德甲降班嘅漢堡會唔會創出球會紀錄？冇錯今季漢堡依然都係死氣沉沉，但係佢哋嘅前中後三線都有唔少球星，話唔定會起到作用！（周一4，有線61、64、201及203台周二1:00am直播）

百年老店漢堡從來未試過喺德甲降班，的確佢哋喺首回合主場俾卡爾斯魯厄迫和1:1都幾麻煩，不過仲可以睇高一線！賽前有消息話，門將杜布尼仲未出得，另外左閘馬素贊臣同埋中場比哈美亦喺傷兵名單，而哥高加卡就要停賽，不過唔好忘記今晚有機會把關嘅艾達早年曾經同拜仁嘅紐亞鬥過你死我活，若果唔係重傷嘅話可能已經係國家隊嘅二號門將，另外佢哋仲有隊長雲達華治、伊利斯域，同埋經驗老到嘅奧歷，唔似得卡爾斯魯厄得個射手洛雲軒寧斯見得人，頂多數埋日本腳山田大記。
數球星漢堡明顯已經佔晒上風，而呢一班人起碼個個都見過大場面先，仲記得佢哋上季喺留級附加賽首回合喺主場只係同格雷特霍夫踢成0:0平手，次回合作客就和1:1，憑住作客入球留喺德甲，隊中唔少球員都有晒護級經驗，嚟到呢類關鍵時刻，正正要靠經驗食住對手。