卡利亞里主場「尼」料

卡利亞里主場「尼」料 
  

除咗拿玻里對拉素，其餘意甲都只係例行公事，費格然個人就會向幾支主隊埋手，好似卡利亞里對烏甸尼斯比賽，話晒都係降班前主場謝幕戰，贏番場安慰吓班卡利亞里球迷都得啩。（周日22，無綫網絡電視301頻道周一12:00am直播）

講真卡利亞里雖然最後要降班咋，但最後幾場波表現其實唔差，起碼叫做贏過費倫天拿、帕爾馬同切塞納，又作客迫和到祖雲達斯，唔知幾多護級成功球隊都做唔到啦。冇錯，卡軍中場丹尼爾干迪、高素、後衛馬高卡佩安奴同門神哥隆比都出唔到，但佢哋都傷咗一排，證明唔係好影響到球隊，我信佢哋可以主場贏波光榮降班。
烏甸尼斯自護級成功後就散晒，近3場波對森多利亞、羅馬同薩斯索羅全部送3分，當中仲有2場係主場，戰意係點大家心照；再講老將迪拿達利話退休依家又有機會唔退，呢場未必係佢告別賽，冇埋呢個借口好難信佢哋今場做到嘢。
另一關就揀費倫俾大家。除咗主場謝幕，佢哋近2周都保持全勝仲場場入3球，鬥志未見走樣，近4場波未贏過嘅基爾禾睇怕都冇能力搞寸個Party啩。（周日29，香港時間周一2:45am開賽）