阿仙奴小勝「士」日重心

阿仙奴小勝「士」日重心 

衛冕足總盃真係咁易？今晚英西德三場盃賽決賽先後上演，英格蘭足總盃衛冕冠軍阿仙奴將會迎接維拉挑戰，表面上兵工廠應該毫無意外可以連續兩年攞到呢個冠軍，不過上季侯城夠易打啦，阿仙奴咪又係搞到加時至贏，而且雲格向來保守，呢場點會咁早放膽搶攻，玩吓手又俾賓迪基屈一球先，下半場先反勝對手，僅勝1球機會實在太大。（周六28，now621及633台周日12:30am直播）

同上屆比，阿仙奴今季唔多唔少都算有啲進步，同樣嘅半季冠軍，聯賽由第4升上第3，季尾走勢強勁，煞科戰大勝4:1，都反映到現時呢隊阿仙奴狀態唔差，不過同上季嘅決賽一樣，都幾可以肯定呢隊阿仙奴喺決賽要背上熱門嘅沉重壓力，上季對侯城上半場連失2球，靠卡索拉早早追番粒救回一命，打到加時至反勝，阿仙奴喺關鍵大戰嘅心理質素向來一般。

阿仙奴遇壓力多失準

當然好多人覺得佢哋今季有進步，但主場對摩納哥嘅慘敗，又再證明阿仙奴真係一隊，愈有期待愈覺無奈嘅球隊，所以今晚全世界都認為佢哋贏硬嘅時間，隨時又令大家失望而回。

賓迪基食住對手後衛

咁當然，要阿仙奴輸都要維拉有本事至得，的而且確，球隊換上舒活後表現大有進展，尤其打番起賓迪基，呢個射手3月起轟入11個入球，絕對係今場維拉博爆冷最大武器，今場呢個比利時射手對住梅迪薩卡及高斯尼，速度身形上都佔絕對優勢，如果阿仙奴又好似上季咁半場魂遊，維拉有可能成為先開紀錄一方。
不過維拉領先唔代表阿仙奴追唔番，禾確特剛戰半場大演帽子戲法，呢場絕對有可能取代7場冇波入嘅基奧特任正選，就算落後要攻，換基奧特入嚟打雙箭頭又得，基於維拉防線都係脆過威化餅，尤其個巴特古辛係後防一大腫瘤，阿仙奴一個半場反敗為勝絕對係能力範圍之內，睇嚟好有可能出現2:1左右嘅比數，阿迷又可喺驚心動魄下慶祝捧盃。