賓菲加爭盃無「迪」手

賓菲加爭盃無「迪」手
     
葡萄牙聯賽盃決賽由賓菲加同馬里迪莫爭霸，兩隊啱啱先至喺葡超交手，當時賓菲加輕鬆大勝，鑑於兩軍實力有頗大距離，預計歷史重演嘅機會好大，足智彩開讓球主客和，熱捧賓菲加「讓主」。（周五5，香港時間周六2:45am開賽）
坦白講，葡萄牙球會實力有幾咁懸殊，大家都心中有數啦，除咗波圖、賓菲加同埋士砵亭有得鬥下之外，其他球隊都係陪跑份子，加上賓菲加提早一輪宣布奪得聯賽冠軍，全隊更可將注意力集中喺呢場聯賽盃決賽，當然有著數啦！洛迪高利馬同埋莊拿斯干卡維斯呢對攻擊組合季尾愈戰愈勇，絕對係入球停不了，加上查度利華度、伊度亞度沙維奧同埋安達臣雷沙奧等主力亦保持狀態，故此賓菲加贏面真係好高，問題只係炒幾多球，難怪「讓主」咁熱。
馬里迪莫季尾其實保持咗9場不敗，偏偏第10場就遇著今戰對手賓菲加，結果輸1:4而回，僅由馬利加攻入破蛋一球，但防線就俾洛迪高利馬同埋莊拿斯干卡維斯分別梅開二度，再睇埋往績，原來佢哋近6次對賓菲加輸咗5次，近兩次都要失4球，所以今晚莫講話爆冷，甚至連輸少啲都有難度，雖然作為球迷，好想睇到兩支實力相若嘅球隊爭冠軍，無奈呢場決賽冇乜懸念，買波更不容拗氣，一於捧賓菲加「讓主」啦。