1860慕尼黑爆「基」達人

1860慕尼黑爆「基」達人
 
排名底就等於實力弱？喺大部份時間都係正確，不過就唔可以應用喺今季德乙嘞，事關由升班區域到降班區域只係相差22分咁少，證明咗大家嘅實力異常接近，1860慕尼黑唔係弱到任人魚肉。（周五4，香港時間周六2:30am開賽）

得一種情況升班區域同降班區域相差22分咁少，就係聯賽入面嘅球隊實力非常接近，話唔定1860慕尼黑只要喺對上幾場聯賽有運些少贏埋就唔使淪落到踢留級附加賽啦，不過今晚佢哋並唔需要幸運女神嘅眷顧，事關對手只係嚟自德丙嘅基爾，橫睇掂睇都係佢哋稍為超班喎。

新星艾隆冒起迅速

當然話知道一隊德丙球隊有幾多料到就肯定係呃你嘅，不過呢隊基爾明顯就係有前冇後、打死罷就嘅典型全攻型嘅球隊，由上個月頭開始計起總共踢過8場賽事，僅得2戰能夠保持清白之身冇失波，嚟到附加賽越級挑戰一隊德乙球隊唔識擺番個「大巴陣」落到場肯定好輸蝕。
至於今個回合率先作客嘅1860慕尼黑喺過去兩季喺德乙仲排緊中上游，今季搞到要護級好大程度係由於兵源出咗大問題，季初當奧地利射手奧高泰腳風順嗰陣的確見唔到有任何問題，去到歇冬返嚟之後更加貢獻咗12個入波咁多，問題係自佢傷出之後，一直都搵唔到一個識得喺關鍵時刻入波嘅前鋒，最慘就係西班牙外援洛迪里奧斯、基斯甸西蒙，甚至計埋馬里奧斯禾夫嘅入波數字竟然用一隻手都數得晒，完全唔識入波搞到其後成績大幅滑落，季中更加要再青年軍教頭方寧頂替。
好在嚟到季尾1860慕尼黑突然打起咗中場艾隆，話晒近期都贏過紐倫堡，要贏嚟自德丙嘅基爾唔會有乜大問題。