維拉利爾「萊」勢洶洶

維拉利爾「萊」勢洶洶
   
澳洲球隊阿德萊德聯約戰西甲黑馬維拉利爾拍跳，坦白講，真係未打都知邊隊贏，投注策略唔使諗咁多，向黃色潛艇大炒方向埋手就得喇，加上有直播，就買「讓客」睇波啦！（周五1，有線61、64、201及203台周五6:00pm直播）

阿德萊德聯喺澳職季後賽4強被FC悉尼淘汰，但係嚴格嚟講，今季嘅成績都算達標，故此前傑志教練甘巴爾亦可以安心留任，並且為新球季作部署，咁快就約戰歐洲勁旅拍跳當然係好事啦，仲可以順道推廣下澳洲職業聯賽，真係何樂而不為。

季尾狀態比較好嘅阿德萊德聯球員包括奇治葛雲，佢連續兩場季後賽都取得「士哥」，柏蘭卡、柏保路山齊士、泰歷艾列治同埋沙治奧施里奧嘅表現都唔差，不過今場始終係友賽，相信教練甘巴爾亦樂於派遣馬比呢類新秀落場，當汲取經驗。

黃潛級數高起碼一班

維拉利爾用第6名衝過西甲終點，排名喺佢哋之上嘅球隊包括巴塞隆拿、皇家馬德里、馬德里體育會、華倫西亞同埋西維爾，所以黃色潛艇攞到咁嘅成績莫講話唔失禮，直頭係超額完成，季中一度保持嘅連續17場不敗，更令人刮目相看。
前鋒韋圖成為今夏轉會搶手貨，雖然佢嘅入球數字喺季尾稍稍遜色，但好在其他拍檔包括謝拉特摩蘭奴、查美哥斯達同埋莊拿芬杜斯山度士嘅水準持續穩定，故此喺以波論波之下，維拉利爾仍然高阿德萊德聯一班，「讓客」放心捧。