漢堡主勝「魯」生常談

漢堡主勝「魯」生常談 

今晚都幾多附加賽上演，當中德甲附加賽一連兩年見到漢堡，都肯定令到呢間百年老店球迷相當失望，不過一來呢支德甲傳統勁旅有一個從未降班嘅優良紀錄，二來佢哋近況同去年比其實好得多，睇怕德乙排第三嘅卡爾斯魯厄唔係咁易喺首回合力保不失，信漢堡可先下一城。（周四3，有線61、62、201及203台周五2:30am直播）

 
德甲轉播權下季易手，各位德甲迷下季有冇波睇都未知，剩番2場附加賽大家有得睇好睇住先，而呢個兩回合附加賽，漢堡班球員就夠晒經驗啦！上季佢哋一樣喺尾三過終點，結果兩回合都賽和格雷特霍夫，僅僅憑一個作客入球保住德甲席位，所以唔少漢堡球迷都非常擔心，怕佢哋今季好難再有咁好彩，史上第一次降落德乙。
 
不過漢堡上季係5連敗跌落尾三，而今季則喺最後5戰3勝1和，士氣同信心都應該比上季好得多，當中射手奧歷復出後喺呢5場入咗2球，睇嚟漢堡如果齊章嘅話，又未至於衰成咁。而佢哋個中場大將雲達華治近日有傳會重返阿積士，不過喺呢兩場大戰前佢都例牌否認，睇嚟走唔走都好視乎漢堡下季仲係咪甲組球隊啦！呢位荷蘭國腳應該都會博盡嘅。

客軍近四戰不勝
 
對比起漢堡，卡爾斯魯厄近4場2和2負，幾仗前不敵達斯泰特，絕對係佢哋未能夠以第二位直接升班嘅最關鍵一役，不過就嗰場嚟睇，卡爾斯魯厄喺主場都贏唔到同級對手，實力上同漢堡應該尚有差距，而佢哋喺德乙之所以殺到上第三，都係靠防守穩健制勝，所以今場佢哋心態上肯定希望踢成0:0下，漢堡反而有90分鐘主動取勝嘅機會，睇怕「豐富」嘅附加賽經驗一定幫到主隊，先下一城應該冇咩難度。