國安家門口拆“車”

國安家門口拆“車”

    歐洲五大聯賽戰火逐漸熄滅，睇返今日賽程，相信最受大家關注，應該係亞冠盃十六強第二回合賽事，北京國安主場迎戰韓國勁旅全北汽車。

    雙方在首回合踢成一比一平手，揸住一個作客入球在手，兼有主場之利嘅國安，要殺入八強明顯佔優勢，但最緊要球隊能夠擺脱“恐韓症”心理包袱，繼續衆志成城踢出首回合嘅鬥志，國安的確有望衝入八強。球隊為準備今場大戰，上場中超對住江蘇舜天明顯留力，兩大強援丹贊奴域與巴泰拿只列後備，老將邵佳一與徐雲龍踢半場波，張呈棟、朗征及宋搏軒更全面休戰，擺到明今仗全力搏殺。

    全北汽車在首回合領先一球下，完場前被國安一個十二碼追和，當然深深不忿，但睇返整場比賽，兩隊勢均力敵。由於全北汽車勢要爭取入球不可，預料今仗必會反客為主採取主攻，但考慮到國安首回合防守相當出色，且多次反擊亦極具威脅，隨時令全北汽車進退兩難，無論如何身為中國人，點都要撐硬北京國安。

    推介：北京國安2:1