拉素主場拉頭「馬」

拉素主場拉頭「馬」 

拉素為穩守前三踢歐聯，今晚首都打吡迎戰羅馬一定唔會手軟，以佢哋近期嘅發揮，要攞3分唔難，不過足智彩開讓球主客和又過份咗啲，直接買拉素開2.25倍齋Win拉頭「馬」。（周一9，無綫網絡電視302頻道周二12:00am直播）

雖然拉素喺意大利盃加時飲恨不敵祖雲達斯，但係佢哋嘅表現絕對唔差，而且上輪意甲又重回勝軌，作客森多利亞憑真迪列堤一箭定江山小勝1:0，結束意甲兩輪不勝頹勢，喺最後直路及時回勇真係可喜可賀，想直接踢歐聯分組賽更加要醒神。

羅馬缺謝雲奴頭痕

拉素目前僅以1分落後今仗對手羅馬而位列第3，如果唔想踢外圍賽今晚一定要贏，就算拿玻里已無力追趕，拉素都唔可以「Hea踢」，而只要佢哋交出正常水準，要攞3分唔係難事，稍嫌「讓主」太冒險，有信心不如捧主勝。
羅馬近況都唔差，不過佢哋上仗喺主場只能以2:1險勝烏甸尼斯，雖然係近4場聯賽獲得3場勝仗，但過程並唔輕鬆。前鋒謝雲奴、中場史杜特文、後衛李安度卡斯坦同埋前巴西國腳馬爾干全部因傷缺陣，當中以謝雲奴唔踢得影響最大，畢竟王子托迪年事已高，域陀伊巴保又只係啱啱傷癒，另一位射手杜姆比亞嘅水準就略嫌飄忽，打吡戰呢啲咁重要場合信唔過。
而兩隊共用奧林匹高球場，但近3次拉素被編為主場嗰陣，戰績係2勝1和不敗，所以唔使諗咁多，主勝去「馬」。